Espaciu funerariu: a iglesia i as tumbas
Un dus ámbitus máis relevantis documentaus duranti a intervención arqueológica é u asociau a iglesia i sei entronu inmediatu, ondi se han identificau evidencias claras de usu funerariu. Esti espaciu destaca nun solu por a presencia de estructuras arquitectónicas ben definías, sinon tamén por a complejidai das fasis de usu, abandonu i transformación que se han podiu documental a través da excavación en área.
A iglesia se localiza a u sur du segundu recintu o recintu inferiol. Inicialmenti presentaba un estau de conservación condicionau por importantis procesus de derrumbi, tantu nu sei interiol comu nu exteriol. Antis du iniciu da excavación, gran parti de suas estructuras permanecían ocultas baju acumulacións de material procedenti du colapsu dus murus, u que dificultaba sua lectura. A retirá de estis niveis permitiu documental con mayol precisión a configuración du edificiu.
Duranti a excavación se han identificau distintus niveis de usu da iglesia. Algunhus correspondin a procesus naturais tras sei abandonu, mentras que otrus son de origen antrópicu i reflejan sua reutilización en épocas máis recentis. Por ejemplu, se niveló u terrenu interiol usandu materiais procedentis du colapsu dus edificius cercanus, sobre tó tellas, tras u abandonu original du edificiu. Posteriolmenti, se intuyi que foi un espaciu destinau a salvaguardal ganau, feitu que se confirma con un fechamentu posterior du acceso oesti, i a construcción de unha estructura circulal ubicá en u centru du templu con mampostus de pizarra procedentis dus derrumbis originais. Tós estis elementus mostran cómo u edificiu se transformó tras dejal de estal en usu.
Tantu nu interiol comu nas inmediacioóns da iglesia se han documentau numerosas tumbas, toas elas excavás directamenti nu sustratu geológicu. Estas estructuras presentan morfologías antropomorfas ben definías.
A distribución de estas tumbas en tornu a iglesia sugieri a existencia de un espaciu funerariu organizau, vinculau directamenti a u edificiu religiosu. Esti tipu de configuración é habitual en contextus medieváis, ondi as áreas de enterramentu se sitúan en relación con espacius de cultu, reforzandu sei significau simbólicu i social.
U estudiu de esti espaciu en conjuntu permiti entendel a iglesia nun solu comu un edificiu aislau, sinon comu un puntu central dentru da organización du yacimentu, en tornu a u cual se articulan prácticas constructivas, funerarias i de usu du territoriu. A información obtía a través da excavación resulta clavi pa reconstruil u papel de esti enclavi dentru du conjuntu i pa comprendel as dinámicas históricas que han marcau sua evolución.