Lugaris de interés da comarca
U entornu du yacimentu de Salvaleón se sitúa en unha zona de gran riqueza histórica, paisajística i cultural. A escasa distancia é posibli visital diferentis enclavis que permitin amplial a experiencia i comprendel miyol a ocupación du territoriu a u largu du tempu.
San Martín de Trevellu
Información
Destaca por sua arquitectura tradicional ben conservá, con viviendas de entramau de madeira, mampostería i balcóns volaus. Un dus elementus máis característicus é a presencia de regueriurs de agua que discurrin por as callis, vinculaus a un sistema hidráulicu históricu.
Ademáis, é un dus principais núcleus ondi se conserva A Fala, unha lengua propia du val du Xálima.
Ubicación
Castelu de Trevellu
Información
U castelu altumedieval de Trevellu, de origin árabi, se alza sobre un impresionanti crestón rocosu dominandu u paisaje da Serra de Gata. Conserva a Torri du Homenaji i parti du sei recintu irregulal, cuyus murus de mampostería se adaptan de forma sorprendenti a pendienti du terrenu.
Sua ubicación ofreci vistas espectacularis i permiti comprendel sua función estratégica.
Ubicación
Penamacor
Información
Localidai portuguesa situá a escasus kilómetrus da fronteira, cuyu origin se remonta a época medieval. Conserva restus du sei sistema defensivu, entre us tramus de murallas i estructuras asociás a u antigu castelu, documentau desde u siglu XII tras a consolidación du territoriu nu contextu da Reconquista portuguesa.
Ubicación
Castelu das Ellas
Información
Declarau Ben de Interés Cultural, se sitúa en unha posición estratégica clavi entre us antiguus pasus de montaña. Aunque hoixi se conserva en estau de ruina consolidá, aún podin velsi dois torreóns i parti du recintu, integrau nu actual cementeriu. Suas estructuras, fechás principalmenti entre us siglus XV i XVI, permitin recuñucel sua función defensiva na fronteira con Portugal.
Un enclavi cargau de historia, ideal pa entendel u papel milital da zona i disfrutar du entornu serranu.
Ubicación
Dólmenes de Pradocastañu
Información
U dolmen de Pradocastañu é un dus conjuntus megalíticus máis destacaus da zona i se encontra perfectamenti musealizau, con paneis explicativus que facilitan sua visita. Se trata de un dolmen de corredol cuya cámara conserva ortoestatus decoraus con grabaus zoomorfus i soliformis, ademais de unha singulal peza de carácter antropomorfu. Forma parti de unha necrópolis máis amplia, u que permiti comprendel miyol as prácticas funerarias prehistóricas.
Un lugal ideal pa acercalsi de forma directa a u pasau máis antigu du territoriu.
Ubicación
Santibáñez u Altu
Información
Localidai situá a máis de 600 metrus de altitú, dominá por sei castelu de origin islámicu, posteriolmenti reformau en época cristiana. Desde esti puntu se obtén unha amplia visibilidai sobre u embalsi du Borbollón i u corredol natural da comarca.
Ubicación
Gata
Información
É un dus pueblus con máis encantu da comarca, ideal pa paseal entre callis estreitas i disfrutal da sua arquitectura tradicional. Sua historia se remonta a época romana, i nu siglu XV foi un importanti focu cultural vinculau a Orden de Alcántara i a figura de Antonio de Nebrija.
Hoixi combina patrimoniu, tranquilidai i un entornu natural privilegiau. Un lugal perfectu pa detelsi i disfrutal con calma da Serra de Gata.