Traballus de excavación
Pulsa nus botóns i descubri con máis detalli u que hemus descubertu
Us traballus arqueológicus desarrollaus nu yacimientu de Salvaleón han permitiu avanzal de maneira significativa nu cuñucimentu du enclavi, nun solu a través da excavación, sinon tamén medianti a documentación detallá das suas estructuras, niveis de ocupación i elementus asociaus. Esta intervención ha feitu posibli pasal de unha lectura superficial du yacimentu a unha comprensión mutu máis precisa de sua organización interna i de sua evolución histórica.
A excavación nu anu 2025 se planteó medianti a apertura de tres sondeus distribuíus en áreas clavi du yacimentu. En concretu, a intervención se compusu de tres sondeos repartius en a Coroa, a u oesti du segundu recintu i en u reductu o fortín exteriol. Juntu a excavación en área da iglesia, situá a u sur du recintu inferiol. Istu permitíu abordal u estudiu de espacius con características diversas dentru du conjuntu arqueológicu.
A través de estis traballus se documentaran tantu estructuras visiblis en superficii comu otras que permanecían ocultas baju niveis de derrumbi. A excavación ha permitiu identifical murus, estancias, espacius interioris i elementus constructivus que ajudan a reconstruil a configuración du asentamentu. En a mayoría dus casus, as estructuras están realizás en mampostería de pizarra, u que respondi a disponibilidai de materiais nu entornu inmediatu, aunque tamén se han documentau elementus en granitu que parecin habel siu reutilizaus, ya que esti material nun se encontra nas inmediacións du yacimentu.
Un dus aspectus máis relevantis da intervención ha siu a posibilidai de analizal as secuencias estratigráficas du yacimentu. A excavación nun solu ha permitiu indentifical estructuras, i recollel materiais, sinon tamén comprendel us distintus niveis de ocupación, usu i abandonu. A través du registru estratigráficu se han podiu diferencial fasis constructivas, episodius de colapsu e incendiu i procesus posterioris de usu i aproveitamentu que han afectau a conservación du enclavi.
Entre us hallazgus máis significativus destacan tamén us elementus de carácter funerariu asociaus a u entornu da iglesia. Duranti a excavación en área de esti edificiu se documentaran numerosas tumbas, toas elas excavás directamenti nu sustratu geológicu i con morfologías antropomorfas, u que aporta información relevanti sobre as prácticas funerarias desarrollás nu yacimentu. En determinaus casus, estas estructuras han siu conservás o señalizás pa facilital sua interpretación sin comprometel sua integridai.
Us traballus han permitiu ademais identifical evidencias relacionadas con procesus de reutilización i transformación du espaciu. A presencia de materiais desplazaus, estructuras parcialmenti desmontás o elementus reaproveitaus indica que u yacimentu nun ha permaneciu estáticu, sinon que ha experimentau distintas fasis de ocupación, abandonu i reconfiguración a u largu du tempu.
Tó esti conjuntu de datus ha siu registrau de maneira sistemática medianti documentación gráfica, planimétrica i estratigráfica, generandu unha basi de información sólida que permiti analizal u yacimentu desde múltiplis perspectivas. Esta documentación nun solu resulta esencial pa investigación, sinon que tamén contituyi unha ferramenta clavi pa conservación i posta en valol du enclavi.
Us traballus arqueológicus realizaus en Salvaleón suponin, por tantu, un pasu fundamental nu cuñucimentu du yacimentu. Gracias as intervencións arqueológicas, hoixi é posibli comprendel miyol cómu se organizaba u espaciu, qué tipu de estructuras u conformaban i qué procesus han condicionau sei estau actual. Esta información permiti ademais, oriental futuras intervencións i siguil avanzandu nu estudio de esti enclavi.